Una İjika Chika de Galata

Un rekolyo de suvenires de una vida de 80 anyos i mas. La istorya de una ijika chika de Galata...
Kuando empesi a este lavoro, a relatar mi vida, empesando de mi chikez, mi adolesensya, mi manseves i maturidad, pasaron delantre mis ojos komo una pelikula de filmo. Fue un grande felisidad para mi, de aver reushido a akodrarme kon todos los detalyos, lo ke vide, lo ke sinti i naturalmente los evenimyentos kebivi durante mas de una peryoda de 80 anyos. Perkuri a akodrarme los uzos i tradisyones ke, por lo mas estan para ser olvidados i, pensi ke manera konservarlos en la mezura de mi pueder i kapachidad. Esto era de primera emportansa para mi. Eskrivi sovre la vida tradisyonal de los Djudios de Çorlu, Tekirdağ i Galata. En kontinuando, preferi avlar sovre mis lavoros konsernando muestra lingua tradisyonala el Judeo-Espanyol. Estos lavoros miyos teniyan un buto importante: dar un mesaje sovre lo ke se puede azer para konservar i alargar la vida de muestra lingua.